Wierszyk dla dzieci po śląsku - Już po feryjach
Jak tyn czas nom wartko leci
do zegrodek klupie jesiyń
już feryje sie skończyły
w kalyndorzu piyrszy wrzesiyń
Mamy wiela zarobione
bajtle do szkoły szykujom
szczewiki ancugi tasze
pierom myjom i pucujom
Szkoła przeca to rzecz ważno
tyż troszyczka sie starajom
za to bajtle jak to bajtle
jeszcze dzisiaj w fusbal grajom
No a szkoła nie uciecze
myślom że jakoś to bydzie
jak je i czas na feryje
na nauka tyż czas przidzie
Renia Sobik
Wiersz napisany w gwarze śląskiej. Poniżej tłumaczenie niektórych słów:
feryje - wakacje
zegrodki - ogrody
szczewiki - buty
ancug - ubranie
pucujom - czyszczą
starajom - martwią się
fusbal - piłka nożna
nie uciecze - nie ucieknie
przidzie - przyjdzie
